হেমন্ত কুমাৰ ৰায়
তোৰ নেংটা দেহা
অক্তমাখা গাও
কাওয়ে নাদেখে
দেখে খালি টি.আৰ.পিৰ ভোকাতুৰ কয়টায়
টি.আৰ.পিৰ পত্তিটা পয়ন্টোত
তুই ধৰ্ষণ হৈস টুপটুপি
সমাজে কান্দে
কিন্তুক মুচকি হাসে নৰখাদক কয়টা
তুই ফিৰ বোলে আৰো এক্লা নাহৈস
তোৰ সাথোত আছে নাৰীবাদী, মানবতাবাদী আৰো কতো সমাজ প্ৰেমী মানষিলা...
উমাৰ কৃত্ৰিম প্ৰতিবাদোত তুই আৰো উদাল হৈস
ধৰ্ষিতা হৈস পত্তিটা কন্ঠে কন্ঠে
ৰাজনীতিৰ ভোটবেংকত শুদ্ধিকৰণ হয় তোৰ যৌবন
ইচ্ছামতে ধৰ্ষণেৰ দৰদামো হয়
এমুনে কৰি ব্যবসা হয় তোৰ ধৰ্ষণেৰ
কাৰো পেট ভৰে
কাৰো মন
আৰ কৰো ৰক্ষা হয় সিংহাসন।
(পাইকান পত্ৰিকা, পঞ্চম সংখ্যা, জানুৱাৰী, 2018)
No comments:
Post a Comment