টৌলিয়া : একেনা কৰ্মপদ্ধতি

হেমন্ত কুমাৰ ৰায়

কোচৰাজবংশী সমাজোত চলতি কৰ্মপদ্ধতিলাৰ ভিতিৰা একেনা অন্যতম ব্যবস্থা হইল টৌলিয়া। কুনো অনুষ্ঠানেৰ কাম-কাজ কৰাৰ বাদে ঝিলা গেৰামেৰ  মানষি যোগদান কৰে উমাকে কয় টৌলিয়া। টৌলিয়া মানষিলাৰ পধ্যান কাম হৈল অনুষ্ঠান বাড়ীৰ সৌগ নকণ কাজ কৰি অনুষ্ঠানটা ভালকৰি পাৰ কৰি দেওয়া। টৌলিয়াগুলা যেকুনো বিয়া, অন্নপ্ৰাশন, চুড়াকৰণ, কাম-কিৰিয়াৰ নানান নকণ কাজ কৰে। অনুষ্ঠান বাড়ীৰ পেণ্ডেল বানা, চেয়াৰ-ব্ৰেঞ্চ গোটা, ভাৰা-খোৰা গোটা, চাটাকাটা, সাগাই-সোদৰ খাবাৰ-দাবাৰ দেওয়া-থোয়া কৰা ইত্যাদি সৌগ কাজ কৰে টৌলিয়াগুলায়। অনুষ্ঠানটা শেষ হওয়াৰ পৰেৰ দিন ঝেটা খাওয়া-দাওয়াৰ আয়োজন হয়, তাক কয় 'টউলিয়া-মৌলিয়া'ৰ খাওয়া। টৌলিয়াগুলা সাৰা দিন-ৰাতি খাটি অনুষ্ঠানটা পাৰ কৈৰতে যেহেতু খিব খাটিনী হয়, তাৰে বিনিময়ত পৰেৰ দিন টৌলিয়া-মৌলিয়াৰ খাওয়া-দাওয়াৰ আয়োজন কৰা হয়। এটি 'মৌলিয়া'ৰ শব্দটায় কাজ কৰা মানষিলা ছাৰাও বাকী সাগায়-সোদৰ, নাইয়ৰী আৰ আস-পৰসিৰ মানষিক থাউকাতে বুজায়। এই কৰ্মপদ্ধতিটা খালি কোচৰাজবংশী সমাজোতে নোঞায়, বাকী ভাইল্লা জনগোষ্ঠীৰ মৈধ্যতো দেখা যায়। গেৰামেৰ সৌগ মানষিলাৰ নিজাৰ আস-পৰসিৰ ফিতি যে একটা দায়িত্ব আৰো কৰ্তব্য আছে তাক বুঝা যায় টৌলিয়া ব্যবস্থাৰ মৈধ্য দিয়া।